یہ کہہ رہے ہوتے ہیں انہیں رلاؤ ، اور رلاؤ ، زیادہ رلاؤ ۔۔۔۔ اداکارہ نور بخاری نے پاکستان کے مارننگ شوز کے پیچھے چھپے ڈرامے کو بے نقاب کردیا

کراچی(ویب ڈیسک) سابق اداکارہ نوربخاری نے ندا یاسر پر تنقید کرتے ہوئے کہا ہے کہ سارے مارننگ شوز میں متاثرین کو بلایا جاتا ہے اور پھر ریٹنگ کے لیے انہیں رلایا جاتا ہے۔مارننگ شوکی میزبان ندا یاسر ظلم کے بعد زندگی سے محروم کی جانیوالی مروہ کے والدین کو شومیں بلاکران سے بچی کے کیس

سے متعلق انتہائی غیر سنجیدہ سوالات پوچھنے پرپچھلے کچھ دنوں سے شدید تنقید کی زد میں ہیں۔سیاستدان و میزبان عامر لیاقت کی سابق بیوی بشریٰ اقبال نے بھی ندا یاسر کی اس حرکت پر تنقید کرتے ہوئے ایک ویڈیو جاری کی ہے جس میں انہوں نے کہا کہ ’’خدارا یہ قوم کی بچیاں ہیں، ہماری بیٹیاں ہیں، ان کے ساتھ پہلے ظلم ہوتا ہے اور پھر بار بار ہوتا ہے ۔ بشریٰ نے کہا ان کے گھر والوں کے گھاؤ اور دکھوں پر مرہم رکھنے کے بجائے اپنی کمائی کا ذریعہ بناتے ہیں۔ اپنے پروگرامزمیں بلا کر ان ماں باپ یا گھر والوں سے ان کی بیٹی کے ساتھ ہونے والے ظلم کا واقعہ پوچھنا یا بیان کرنا ان کے لیے کسی موت سے کم نہیں۔ بس کردیں ریٹنگز کی دوڑ !! یہ دکھ، صدمہ ہم سب کا اجتماعی دکھ ہے۔ ایسے شرمناک کیسز کے خلاف آواز بنیں نہ کہ ان کی تکلیف میں اضافے کا باعث !! ذرائع ابلاغ کا درست استعمال بھی ہماری معاشرتی ذمہ داریوں میں شامل ہے۔‘‘بشریٰ اقبال کی اس ویڈیو پر نور بخاری نے کمنٹ کرکے مارننگ شوز کی حقیقت بیان کرتے ہوئے کہا کہ ’’ہاں یہ سب یہی کرتے ہیں۔ سارے مارننگ شوز افسوسناک ہیں۔ یہ لوگ متاثرین کو بلاتے ہیں اور پھر میزبان کو کہا جاتا ہے رلاؤ ان کو رلاؤ اور رلاؤ۔ میں نے ایک بار ایک شو اسی نفرت انگیز رویے کی وجہ سے چھوڑا تھا۔‘‘ نور بخاری کے کمنٹ کا اسکرین شاٹ سوشل میڈیا پر وائرل ہورہا ہے۔دوسری جانب ندا یاسر نے ایک ویڈیو پیغام میں مروہ کے والدین کو شوپر بلانے پر معافی مانگتے ہوئے کہا تھا کہ ہم نے بچی کے گھروالوں کو نہیں بلایا تھا بلکہ انہوں نے خود آنے کی فرمائش کی تھی۔ لیکن وقار ذکا نےدعویٰ کرتے ہوئے کہا ہے کہ ندا یاسر جھوٹ بول رہی ہیں بچی کے والدین نے ندا یاسر کے شو میں جانے کا کوئی مطالبہ نہیں کیا تھا۔