ڈالر سستا لیکن سونے کی قیمت میں کتنا اضافہ ہوگیا؟ فی تولہ سونے کی قیمت سامنے آگئی

کراچی(نیوز ڈیسک) صرافہ مارکیٹوں میں فی تولہ سونے کی قیمت میں ایک ہزار اور 10گرام سونے کی قیمت میں 857 روپے کا اضافہ ہوا ہے۔

بین الاقوامی بلین مارکیٹ میں فی اونس 24 قیراط سونے کی قیمت 27ڈالر کی کمی سے 1918ڈالر کی سطح پرپہنچنے کے باعث مقامی صرافہ مارکیٹوں میں بھی جمعرات کو فی تولہ اور فی دس گرام سونے کی قیمتوں میں بالترتیب 1000روپے اور 857روپے کا اضافہ ہوگیا.

قیمتوں میں اضافے کے نتیجے میں کراچی حیدرآباد سکھر ملتان لاہور فیصل آباد اسلام آباد راولپنڈی پشاور اور کوئٹہ کی صرافہ مارکٹوں میں فی تولہ سونے کی قیمت بڑھکر 114600روپے اور فی دس گرام سونے کی قیمت بڑھکر کر 98251روپے ہوگئی۔

بلین مارکیٹ کے نمائندوں کا کہناہے کہ دبئی گولڈ مارکیٹ کے مقابلے میں پاکستانی صرافہ مارکیٹوں میں جمعرات کو بھی فی تولہ سونے کی قیمت 2509روپے کم رہی ہے۔ اسی طرح تولہ چاندی کی قیمت 20روپے بڑھکر 1220روپے اور فی دس گرام چاندی کی قیمت 17روپے 15پیسے بڑھکر 1045روپے 95پیسے ہوگئی۔

دوسری جانب زرمبادلہ کی مارکیٹوں میں روپے کی نسبت امریکی ڈالر کی قدر کو تنزلی کا سامنا رہا ہے۔زرمبادلہ کی دونوں مارکیٹوں میں جمعرات کو بھی روپے کی نسبت امریکی ڈالر کی قدر کو تنزلی کا سامنا رہا جس سے انٹربینک مارکیٹ میں ڈالر کی قدر 6 ماہ کم ترین سطح پر پہنچ گئی۔

انٹر بینک مارکیٹ میں ڈالرکی قدر اتارچڑھاؤ کے بعد 35 پیسے کی کمی سے 159 روپے 46پیسے کی سطح پر بند ہوئی۔واضح رہے کہ اس سے قبل 5مئی 2020 کو انٹر بینک میں ڈالر کی قدر 159.65 روپے تھی۔

اس طرح سے گزشتہ دو ماہ کے دوران انٹر بینک مارکیٹ میں ڈالرکی قدر میں مجموعی طورپر 8.97 روپے کی کمی واقع ہوچکی ہے۔ اسی طرح اوپن کرنسی مارکیٹ میں بھی ڈالر کی قدر ڈالر کی قدر 25پیسے کی کمی سے 159روپے 70پیسے کی سطح پر بند ہوئی۔