قسمت ہو تو ایسی!!! غلط بٹن دبانے سے خاتون کروڑوں ڈالرز کی مالکن بن گئی

لاہور: (ویب ڈیسک) غلطی سے دوسرا بٹن دبا کر مہنگی لاٹری خریدنے والی خاتون اپنی غلطی کی وجہ سے ہی کروڑوں ڈالرز کی مالکن بن گئی۔ غیر ملکی میڈیا رپورٹ کے مطابق ایک امریکی خاتون کو ایک شخص نے دھکا دیا اور غلطی سے دوسرا بٹن دبنے سے انہوں نے لاٹری کا مہنگا کارڈ خرید لیا، لیکن اس کارڈ نے انہیں ایک کروڑ ڈالر کا مالک بنا دیا۔ رپورٹ میں بتایا گیا ہے کہ لاکویڈرا ایڈورڈز لاس اینجلس کی سپرمارکیٹ میں ایک خاتون پاوربال جیک پاٹ پر قسمت آزمائی کررہی تھیں کہ ایک شخص بہت بدتمیزی سے ان سے ٹکرایا، اس ٹھوکر سے خاتون سے مشین پر غلط بٹن دب گیا جس پر خاتون نے برہمی کا اظہار کیا۔ لیکن اسی غلطی اور شخص کے ٹکرانے نے خاتون کو ارب پتی بنا ڈالا، خاتون مشین سے اسکریچ کارڈ خرید رہی تھی اور غلط بٹن دبنے سے اس نے سستا اسکریچ کارڈ خریدنے کے بجائے 30 ڈالر کا اسکریچ کارڈ خرید لیا۔ خاتون کو ایک پل کے لئے اس شخص پر غصہ تو آیا اور وہ ٹکرانے والے شخص کو دل ہی دل میں بھلا برا کہتی ہوئیں باہر آئیں اور اپنی گاڑی میں بیٹھ کر اسکریچ کارڈ کے نمبر معلوم کرنے لگیں۔ کچھ دیر بعد انہیں معلوم ہوا کہ حادثاتی طور پر خریدا جانے والا مہنگا ترین ٹکٹ ان کے لیے لاٹری کا سب سے بڑا انعام لے آیا اور وہ اس معمولی سی غلطی کی وجہ سے ایک کروڑ ڈالر کا انعام جیت گئی ہیں۔ یاد رہے کہ یہ رقم پاکستانی روپوں میں ایک ارب 80 کروڑ روپے کے قریب بنتی ہے۔ اب پانچ ماہ بعد انہیں ٹیکس کٹنے کے بعد انعامی رقم مل چکی ہے، خاتون نے بتایا کہ اس رقم سے خاتون اپنے لیے ایک گھر خریدنا چاہتی ہیں۔