عوام کیلئے بری خبر۔۔۔ آئل اور گھی کی قیمتوں میں ایک بار پھر اضافہ کر دیا گیا

لاہور(ویب ڈیسک) شہر میں مہنگائی کے سونامی کی تباہ کاریاں جاری ،درجہ دوم کے گھی کی قیمتوں میں تسلسل کیساتھ اضافے کا سلسلہ جاری ہے۔ شہر کی اوپن مارکیٹ میں درجہ دوم کے گھی اور آئل کی قیمتوں میں 5 روپے فی کلوگرام کا اضافہ ہوگیا۔آئل اور گھی کی قیمتوں میں روزانہ کی

بنیاد پر اضافے نے شہریوں کو پریشان کرکے رکھ دیا ہے ۔ درجہ دوم کا گھی 5 روپے بڑھ کر ہول سیل میں 561 روپے فی کلوگرام میں فروخت ہورہا ہے۔شہریوں کو درجہ دوم کا گھی پرچون فروشوں سے 570 روپے فی کلوگرام میں ملے گا گھی اور آئل کی قیمتوں میں اضافے کے حوالے سے ملز مالکان کا کہنا ہے کہ خام مال کی قیمتوں میں اضافے کے باعث گھی کے نرخ بڑھے۔ گھی اور آئل مینوفیکچررز نے درجہ دوم کے گھی اور آئل کی نئی ہول سیل قیمت کا اطلاق کر دیا ہے ۔دوسری جانب ملک میں اشیائے خورونوش کی قیمتوں میں بے مثال اضافے کے بعد شہریوں کو ریلیف ملنے کا امکان ہے کیوں کہ انڈونیشیا اور ملائیشیا کی حکومتیں خوردنی تیل سے لیس 10 جہاز پاکستان بھیج رہی ہیں تاکہ ملک میں طلب کو پورا کیا جاسکے۔وزیر اعظم کے دفتر سے جاری کردہ بیان میں کہا گیا کہ انڈونیشیا اور ملائیشیا سے آنے والے خوردنی تیل کے 10 جہاز آئندہ دو ہفتوں میں پاکستان پہنچ جائیں گے۔یہ پیش رفت 10 جون وزیر اعظم شہباز شریف کی انڈونیشین صدر جوکو ویدودو سے ٹیلوفونک گفتگو کے بعد سامنے آئی۔تیل کی درآمدات کے لیے وزیراعظم کی ہدایت پر پاکستانی وفد نے انڈونیشیا کی وزارت تجارت سے کامیاب مذاکرات کیے۔ وزیر اعظم کے دفتر سے جاری کردہ بیان میں کہا گیا کہ وفاقی وزیر تجارت و پیداوار سید مرتضیٰ محمود نے انڈونیشیا کے ہم منصب سے ملاقات کی، انڈونیشیا کا دورہ کرنے والے وفد میں وناسپتی مینو فیکچرر ایسوسی ایشن کے چیئرمین طارق اللہ صوفی اور رکن راشد جان محمد بھی شامل تھے۔بیان میں کہا گیا کہ ’ آج 30 ہزار ٹن خوردنی تیل سے لیس جہاز پاکستان کے لیے روانہ ہوگا، اس وقت انڈونیشا پاکستان کو ڈھائی لاکھ ٹن تیل فراہم کر رہا ہے‘۔پاکستانی وفد کی درخواست پر انڈونیشین حکومت نے تمام متعلقہ مسائل پر تیزی سے کارروائی شروع کردی ہے، تاہم اس حوالے سے اب تک آگاہ نہیں کیا گیا کہ دونوں ممالک پاکستان کو کن شرائط و ضوابط پر خوردنی تیل بھیج رہے ہیں۔ملک بھر میں خوردنی تیل کی قیمتیں تیزی سے بڑھ رہی ہیں اور مارکیٹ میں تیل 600 فی لیٹر تک میں فروخت کیا جارہا ہے۔