اسلام آباد: (ویب ڈیسک) چیئرمین پاکستان تحریک انصاف عمران خان سے ڈاکٹر بابر اعوان نے ملاقات کی، جس میں عمران خان نے الیکشن کمیشن پر تنقید کرتے ہوئے کہا کہ الیکشن کمیشن ایک مخصوص پارٹی کا ونگ بننے سے باز رہے۔ ملاقات میں قانونی، آئینی و سیاسی معاملات پر مشاورت کی گئی۔
تفصیلات کے مطابق چیئرمین پاکستان تحریک انصاف عمران خان سے ڈاکٹر بابر اعوان نے ملاقات کی، جس میں عمران خان نے الیکشن کمیشن پر تنقید کرتے ہوئے کہا کہ الیکشن کمیشن ایک مخصوص پارٹی کا ونگ بننے سے باز رہے۔ ملاقات میں قانونی، آئینی و سیاسی معاملات پر مشاورت کی گئی۔ اس دوران عمران خان نے ڈاکٹر بابر اعوان سے گفتگو کرتے ہوئے کہا کہ ملک کی سب سے بڑی جمہوری پارٹی کو الیکشن کمیشن پر اعتماد نہیں۔عمران خان نے الیکشن کمیشن سے متعلق قانونی معاملات کا ٹاسک بابر اعوان کو دے دیا۔ دوسری جانب الیکشن کمیشن نے پنجاب کے 20 حلقوں کے ضمنی انتخاب میں دھاندلی کے الزامات مسترد کردیے۔ الیکشن کمیشن کی جانب سے سماجی رابطے کی ویب سائٹ ٹویٹر پر جاری کردہ اعلامیے میں چیف الیکشن کمشنر پربھی بے بنیاد اور غیر ذمہ دارانہ الزامات کی مذمت کی گئی ہے۔ اعلامیے میں اس تاثر کی تردید کی گئی ہے کہ ووٹرز کو جان بوجھ کر دور دراز علاقوں میں شفٹ کیا گیا یا حلقہ بندیوں کو تبدیل کیا گیا ہے۔ صوبے میں 20 حلقوں میں ضمنی الیکشن موجودہ فہرستوں اور حلقہ بندیوں پر ہو رہے ہیں۔اعلامیے میں کہا گیا ہےکہ چند روز سے بعض سیاسی شخصیات کی طرف سے الیکشن کمیشن پر الزامات لگائےگئے، پنجاب کے 20 حلقوں میں شفاف الیکشن کے لیے مناسب انتظامات کیےگئے ہیں۔ الیکشن کمیشن کا کہنا ہےکہ اس نے با اثر لوگوں کے خلاف بلا امتیاز اور بھرپور کارروائی بھی کی، الیکشن کمیشن آئندہ بھی تمام انتخابات میں ایسا ہی کرتا رہےگا۔ 2023ء کے عام انتخابات کے لیے غیر حتمی انتخابی فہرستیں ڈسپلے سینٹرز میں رکھ دی گئی ہیں، امید ہےکہ تمام سیاسی جماعتیں آئندہ ایسے بے بنیاد الزامات سے اجتناب کریں گی۔