فیصل آباد(ویب ڈیسک) پاکستان تحریک انصاف کے مرکزی سیکرٹری اطلاعات فرخ حبیب کا کہنا ہے کہ غلامی نامنظور تحریک کی مقبولیت سے حکومت کی کانپیں ٹانگنا شروع ہوگئی ہیں۔ فرخ حبیب نے رانا ثناء اللہ کی گفتگو پر ردعمل دیتے ہوئے کہا کہ منشیات کے مقدمے میں پیشی پر آنے والا شخص قوم کو قانون کی بالا دستی کا درس دے رہا ہے۔
انہوں نے کہا کہ تحریک انصاف حکومت نے اپنے دور میں ایک بھی سیاسی مخالف پر کوئی انتقامی مقدمہ نہیں بنایا، امپورٹڈ حکومت نے سیاسی مخالفین کے خلاف توہین مذہب کا شرمناک استعمال کیا۔ فرخ حبیب نے کہا کہ عمران خان کی حقیقی آزادی کی تحریک عوام میں بھرپور مقبولیت حاصل کر رہی ہے، غلامی نامنظور تحریک کی مقبولیت سے حکومت کی کانپیں ٹانگنا شروع ہوگئی ہیں۔ انہوں نے مزید کہا کہ امپورٹڈ حکمران پرامن تحریک پر دھمکیاں دے رہے ہیں، یہ فاشسٹ حکومت ہے، حکومت ملک کے امن و امان کو تباہ برباد کرنے کی دھمکی دے رہی ہے، یہ لوگ گلی محلوں کی سطح پر فساد اور ملک میں خانہ جنگی چاہتے ہیں۔