اسلام آباد(ویب ڈیسک) سندھ ہاؤس حملہ کیس میں گرفتار پی ٹی آئی کے دو ارکان قومی اسمبلی کو ضمانت پر رہا کرنے کا حکم دے دیا گیا۔ اسلام آباد کے جوڈیشل مجسٹریٹ انعام اللہ نے پی ٹی آئی کے رکن قومی اسمبلی فہیم خان اور عطا اللہ کو ضمانت پر رہا کرنے کا حکم دیا۔
عدالت نے ملزمان کی درخواست ضمانت بعد ازگرفتاری منظور کرلی اور ملزمان کو 50،50 ہزار روپے کے مچلکے جمع کرانے کی ہدایت کی گئی ہے۔ اس کےعلاوہ عدالت نے پی ٹی آئی کے رہنما رائے تنویر کی درخواست ضمانت بعد ازگرفتاری بھی منظور کرلی۔ واضح رہے کہ اسلام آباد ہائیکورٹ سے ضمانت خارج ہونے پر تینوں ملزمان کو احاطہ عدالت سے گرفتار کیا گیا تھا اور مقامی عدالت نے تینوں ملزمان کو جوڈیشل ریمانڈ پر جیل بھیج دیا تھا۔ پی ٹی آئی کے رکن قومی اسمبلی فہیم خان عام انتخابات 2018 میں این اے 241 کراچی کورنگی سے منتخب ہوئے تھے جب کہ عطا اللہ بھی عام انتخابات 2018 میں این اے 250 کورنگی ویسٹ تھری سے رکن منتخب ہوئے تھے۔