لاہور(ویب ڈیسک) مریم نواز کی پاسپورٹ واپسی کی درخواست پر سماعت کرنے والا بینچ ٹوٹ گیا ، بینچ کے جسٹس فاروق حیدر نے کیس سننے سے معذرت کی ۔ مریم نواز نے لاہور ہائیکورٹ میں عمرہ ادائیگی کیلئے پاسپورٹ واپسی کی درخواست دائر کر رکھی ہے جس کی سماعت کیلئے چیف جسٹس لاہور ہائیکورٹ نے
دو رکنی بنچ تشکیل دیا تھا ، پہلے بینچ نے یہ ریمارکس دیتے ہوئے سماعت سے معذرت کر لی کہ مریم نواز کا کیس جسٹس علی باقر نجفی نے سنا تھا ، بہتر ہے وہی اس کیس کی سماعت کریں ، اس کے ساتھ ہی بینچ کی جانب سے فائل چیف جسٹس لاہور ہائیکورٹ کو واپس بھجوا دی گئی ۔ چیف جسٹس لاہور ہائیکورٹ نے جسٹس علی باقر نجفی کی زیر سربراہی جسٹس فاوق حیدر پر مشتمل بینچ کو درخواست سماعت کیلئے دی ، آج جسٹس فاروق حیدر نے بھی کیس کی سماعت سے معذرت کر لی ، جس پر جسٹس علی باقرنجفی نےکیس کی فائل چیف جسٹس کوبھجوادی۔ ادھر مریم نواز کی پاسپورٹ واپسی کی درخواست پر نیب نے جواب جمع کرا دیا اور مریم کی درخواست کی مخالفت کر دی ۔ نیب کی جانب سے کہا گیا کہ مریم نواز کی ضمانت کا فیصلہ سپریم کورٹ میں چیلنج کر رکھا ہے ، مریم نوازکی ضمانت منسوخی کی درخواست بھی دائرکی ہے۔ نیب کی جانب سے استدعا کی گئی کہ مریم نواز کی پاسپورٹ واپسی کی درخواست مستردکی جائے۔