عمران خان کے ٹویٹر اسپیس میں مریم نواز نے شرکت کی یا نہیں؟ اہم خبر سامنے آگئی

اسلام آباد: (ویب ڈیسک) سابق وزیراعظم عمران خان کے ٹویٹر اسپیس میں کیا مسلم لیگ ن کی نائب صدر مریم نواز نے شرکت کی، اس حوالے سے وضاحت سامنے آگئی ہے۔عمران خان کو وزارت عظمیٰ کے منصب سے ہٹانے کے بعد پی ٹی آئی کی جانب سے زبردست عوامی رابطہ مہم کا آغاز کیا گیا اور عمران خان کی کال پر ملک گیر احتجاج کیا گیا۔پارٹی قائد کی جانب سے پشاور اور کراچی میں بھی جلسے کیے گئے جس میں لوگوں کی کثیر تعداد نے شرکت کی۔ اسی حوالے سے سابق وزیراعظم نے گزشتہ روز ٹویٹر اسپیس ( ٹوئٹر آڈیو روم) پر عوام سے خطاب کیا۔تحریک انصاف نے دعویٰ کیا کہ چیئرمین تحریک انصاف نے ٹوئٹر اسپیس پر نیا ریکارڈ اپنے نام کیا ہے۔سوشل میڈیا پر عمران خان کے خطاب کو ہزاروں صارفین کے علاوہ کئی معروف شخصیات نے بھی سنا۔وہیں سوشل میڈیا پر اسپیس کا ایک اسکرین شاٹ تیزی سے وائرل ہورہا ہے جس میں یہ دعویٰ کیا جارہا تھا کہ اس میں عمران خان کی مخالف مسلم لیگ (ن) کی نائب صدر مریم نواز نے بھی شرکت کی۔ تاہم اس اسکرین شاٹ کے وائرل ہونے کے بعد مریم نواز کے پولیٹیکل سیکریٹری ذیشان ملک نے ردعمل دیتے ہوئے اسے جعلی قرار دے دیا۔ ذیشان ملک نے کہا کہ مریم نواز کے اکاؤنٹ سے منسوب یہ اسکرین شاٹ جعلی ہے۔