لندن(ویب ڈیسک) سوشل میڈیا پر سیاسی گرما گرمی سے متعلق ایسی کئی ویڈیوز اور تصاویر موجود ہیں جو کہ دلچسپی کا باعث بن رہی ہیں۔ ہماری ویب ڈاٹ کام کی اس خبر میں آپ کو اسی حوالے سے بتائیں گے۔ لندن میں برطانوی پولیس کی ایک ویڈیو وائرل ہے جس میں
اہلکار بریانی کے ڈبوں سے چکن لیگ پیس کے مزے اڑا رہے ہیں، ساتھ ہی ساتھ سیاسی کارکنان کی جانب سے احتجاج بھی کیا جا رہا ہے۔ ن لیگ کے کارکنان کی جانب سے لندن میں جمائما خان کی رہائش گاہ کے باہر احتجاج کیا جا رہا ہے جبکہ پاکستان تحریک انصاف کے کارکنان کی جانب سے نواز شریف کی رہائش گاہ کے باہر احتجاج کیا جا رہا ہے۔ اس سب میں دلچسپ صورتحال اس وقت سامنے آئی جب سوشل میڈیا پر صحافی معید پیرزادہ کی جانب سے ویڈیو اپلوڈ کی گئی اور لکھا کہ پاکستان مسلم لیگ ن کی جانب سے برطانوی پولیس کو بھی بریانی کا دیوانہ بنا دیا ہے۔ عام طور پر جلسے جلوسوں میں بریانی کے ڈبے ضرور دیے جاتے ہیں لیکن یہ صورتحال تو پاکستان میں نظر آتی ہے۔ مگر سیاسی گرما گرمی میں اب یہی صورتحال برطانیہ میں بھی دکھائی دے رہی ہے۔ بریانی کھاتے کھاتے پولیس یہ بھول گئی کہ ہم اسی سیاسی جماعت کے خلاف سیکیورٹی کے لیے معمور تھے۔