بالی ووڈ کی معروف اداکارہ انتقال کر گئیں

ممبئی: (ویب ڈیسک) بالی ووڈ کی 80 کی دہائی کی مشہور اداکارہ منجو سنگھ 73 سال کی عمر میں انتقال کرگئیں۔ غیر ملکی خبر رساں ادارے کے مطابق لیجنڈ اداکارہ اور فلم پروڈیوسر منجو سنگھ نے 15 اپریل کو اپنی زندگی کی آخری سانس اپنی ممبئی کی رہائشگاہ میں لیں۔ یاد رہے کہ منجو سنگھ 80 کی دہائی کی مشہور اداکارہ تھیں، انہوں فلم گول مال میں امول پالیکر کی بہن رتنا کا کردار نبھایا تھا۔ اس کے علاوہ اداکارہ منجو سنگھ نے اپنی زندگی میں شو ٹائم، ایک کہانی،ادھیکار، سوراج جیسے شوز کی اینکرنگ کی اور انہیں پروڈیوس بھی کیا۔ اداکارہ کی فیملی نے ممبئی کے اخبار میں اُن کی آخری رسومات کے حوالے سے اشتہار شائع کروایا ہے، جس میں بتایا گیا ہے وہ دل کا دورہ پڑنے سے چل بسیں۔ علاوہ ازیں گیت نگار اور اسکرین رائٹر سوانند کرکرے نے اپنا کیرئیر بطور لکھاری منجو سنگھ کے ساتھ کیا، انہوں نے سماجی رابطے کی ویب سائٹ پر اداکارہ کے انتقال پر اظہار تعزیت کیا۔ انہوں نے لکھا کہ منجو جی ہی مجھے شو سوراج لکھنے کےلیے دہلی سے ممبئی لائی تھیں۔