ہیکر سپر پاور کے صدر کی رہائشگاہ میں گھس گئے۔۔۔۔بڑی کارروائی کرڈالی

واشنگٹن (این این آئی) انٹرنیٹ ہیکروں نے دنیا کے طاقت ور ترین صدر کی جائے سکونت وائٹ ہاﺅس کو نشانہ بنایاہے۔ کارروائی کے بعد وہ امریکہ کی خاتون اول کے پاسپورٹ کی فوٹو کاپی حاصل کرنے میں کامیاب ہو گئے اور اس کو انٹرنیٹ پر نشر بھی کر ڈالا۔

غیرملکی خبررساں ادارے کے مطابق لیکس ڈی سی نامی ویب سائٹ نے ہیکروں کی جانب سے افشا کیے جانے والی دستاویزات کی تفصیل بتائی۔ ان میں وائٹ ہاﺅس کے ایک چھوٹے ملازم کی ذاتی ای میلز شامل ہیں جس نے ڈیموکریٹک صدارتی امیدوار ہیلری کلنٹن کی انتخابی مہم میں کام بھی کیا۔ ایک غیر ملکی نیوز ایجنسی کے مطابق انٹیلی جنس اہل کاروں کو شبہ ہے کہ اس کارروائی سے روس کا کوئی تعلق ہے۔

نیوز ایجنسی کا کہنا تھا کہ وائٹ ہاﺅس افشا ہونے والے مواد کی درستی کے بارے میں بیان سے بعض رہا تاہم اس کے ترجمان جوش ارنسٹ کا کہنا تھا کہ انتظامیہ اس معاملے کو سنجیدگی سے لے رہی ہے۔ امریکی وزیر انصاف لوریٹا لنچ نے ایک پریس کانفرنس میں بتایا کہ وہ ان میڈیا رپورٹوں سے باخبر ہیں جس میں امریکی صدر کی اہلیہ کے پاسپورٹ اور وائٹ ہاﺅس کے ایک ملازم کی ای میلز کے بارے میں بتایا گیا ہے۔

(ز،ع)